ಮೈಸೂರು
ಮೈಸೂರಿನ ದಸರಾ ಹಬ್ಬ ಎಂದರೆ ಕೇವಲ ಒಂದು ಹಬ್ಬವಲ್ಲ—ಅದು ಕಣ್ತುಂಬುವ ಸಂಭ್ರಮ, ಮನ ತಟ್ಟುವ ನೆನಪು ಮತ್ತು ನಾಡಿನ ಸಾಂಸ್ಕೃತಿಕ ಪರಂಪರೆಯ ಜೀವಂತ ಪ್ರತೀಕ. ಬಾಲ್ಯದಲ್ಲಿ ಶಾಲೆಗಳಲ್ಲಿ ದಸರಾ ರಜೆ ಘೋಷಿಸಿದಾಗ ಮಕ್ಕಳ ಮುಖದಲ್ಲಿ ಮೂಡುವ ಖುಷಿಯ ಕಿರಣಗಳು ಇಂದು ಕೂಡ ನೆನಪಾಗುತ್ತವೆ. “ರಜೆ ಬಂದಿದೆ, ಹಬ್ಬ ಬಂದಿದೆ” ಎಂದು ಕೈ ಚಪ್ಪಾಳೆ ಹೊಡೆದು ಆನಂದಿಸುವ ಆ ಕ್ಷಣಗಳು ಇನ್ನೂ ಹಸಿರಾಗಿಯೇ ಇವೆ.
ನಗರದಲ್ಲಿ ವಿದ್ಯುತ್ ದೀಪಾಲಂಕಾರ ಹೊಳೆಯುವಾಗ, ಮೈಸೂರಿನ ಬೀದಿಗಳು ನಿಜಕ್ಕೂ ಜಗಮಗಿಸುವ ಕನಸಿನ ದ್ವೀಪಗಳಂತಾಗುತ್ತವೆ. ಮಹಾರಾಜರ ಅರಮನೆಯ ಸುತ್ತಮುತ್ತ ಹಾಸಿದ ಬೆಳಕಿನ ಹೊಳೆ, ಪಕ್ಕದ ಬೀದಿಗಳಲ್ಲಿ ಹರಡಿರುವ ಜನರ ಸಮುದ್ರ, ಎಲ್ಲವು ನೋಡಿದವನ ಕಣ್ಣಿಗೆ ಹಬ್ಬದ ಕವಿತೆಯಂತಾಗುತ್ತದೆ. ದಸರಾ ಜಂಬೂ ಸವಾರಿ ದಿನದಂದು ಅಂಬಾರಿ ಹೊತ್ತ ಆನೆಗಳು ಸಂಭ್ರಮದ ಮೆರವಣಿಗೆಯಲ್ಲಿ ಹೆಜ್ಜೆ ಹಾಕುವ ದೃಶ್ಯವನ್ನು ಸಾವಿರಾರು ಜನರು ಕಣ್ತುಂಬಿಕೊಳ್ಳಲು ಬರುತ್ತಾರೆ. ಆನೆಗಳ ಘನತೆಯ ಹೆಜ್ಜೆ, ನಾದಸ್ವರಗಳ ರಭಸ, ಸೈನಿಕರ ಶಿಸ್ತಿನ ಪಥಸಂಚಲನ—ಎಲ್ಲವೂ ನೋಡಿದವರಿಗೆ ಮರೆಯಲಾಗದ ಅನುಭವ.
ಹಬ್ಬದ ವಿಶೇಷತೆ ಅಂದರೆ ಅದು ಕೇವಲ ಆಚರಣೆಯಲ್ಲ, ಸಮಾಜದ ಒಗ್ಗಟ್ಟನ್ನು ತೋರಿಸುವ ಉತ್ಸವ. ದಸರಾ ಸಂದರ್ಭದಲ್ಲಿ ಕೇವಲ ಮೈಸೂರು ಮಾತ್ರವಲ್ಲ, ಕರ್ನಾಟಕದ ಪ್ರತಿಯೊಂದು ಹೃದಯವು ಒಂದೇ ರಾಗದಲ್ಲಿ ತೂಗುತ್ತದೆ. ನಾಡ ಹಬ್ಬ ಎಂಬ ಹೆಸರೇ ಅದರ ಅರ್ಥವನ್ನು ತಿಳಿಸುತ್ತದೆ—ಇದು ನಾಡಿನ ಹಬ್ಬ, ಜನರ ಹಬ್ಬ, ಪರಂಪರೆಯ ಹಬ್ಬ.
ವರದಿಗಾರನಾಗಿ ನನಗೆ ಈ ಹಬ್ಬದಲ್ಲಿ ಕಾಣುವ ಅತಿ ದೊಡ್ಡ ಸೌಂದರ್ಯ ಎಂದರೆ: ಜನರ ಕಣ್ಗಳಲ್ಲಿ ಮೂಡುವ ಸಂತೋಷ. ಅವರು ಯಾವ ಹಿನ್ನಲೆಯಿಂದ ಬಂದವರಾಗಿದ್ದರೂ, ದಸರಾ ದಿನಗಳಲ್ಲಿ ಎಲ್ಲರೂ ಒಂದೇ ರೀತಿಯಾಗಿ ಸಂತೋಷದಲ್ಲಿ ತೇಲುತ್ತಾರೆ. ಆ ಸಂತೋಷವೇ ಮೈಸೂರಿನ ದಸರಾ ನಿಜವಾದ ಶಕ್ತಿ.
ವರದಿ .ಶಶಿಕಾಂತ್ ಕೊರವರ್
